ഉത്തരം: 500

അല്ലാഹു പറയുന്നു: "അടുക്കുകളായ നിലയില്‍ ഏഴ് ആകാശങ്ങളെ സൃഷ്ടിച്ചവനാണ് അവന്‍''. (അല്‍മുല്‍ക്: 3) ആകാശങ്ങളുടെ അടുക്കുകളായുള്ള സൃഷ്ടി, അല്ലാഹുവിന്റെ മഹത്തായ കഴിവും സമഗ്രജ്ഞാനവും വ്യക്തമാക്കുന്നു. എല്ലാം നിയമിതമായി സൃഷ്ടിക്കുകയും നിയന്ത്രിക്കുകയും ചെയ്യുന്നവന്‍ ഒരുവനായ അല്ലാഹു മാത്രമാണെന്ന് ഈ വാക്യം നമ്മെ ബോധ്യപ്പെടുത്തുന്നു.

പ്രവാചകനുചരനായ ഇബ്നു മസ്ഊദ് (റളിയല്ലാഹു അന്‍ഹു) പറഞ്ഞു: "ഭൂമിയോട് ഏറ്റവും അടുത്ത ആകാശത്തിനും അതിനുശേഷമുള്ള ആകാശത്തിനും ഇടയില്‍ അഞ്ഞൂറു വര്‍ഷത്തെ വഴിദൂരം ഉണ്ട്. ഓരോ ആകാശത്തിന്റെ ഇടയിലും അഞ്ഞൂറു വര്‍ഷത്തെ വഴിദൂരമുണ്ട്. ഏഴാനാകാശത്തിനും "കുര്‍സിയ്യി'ക്കുമിടയില്‍ അഞ്ഞൂറു വര്‍ഷത്തെ വഴിദൂരമുണ്ട്. "കുര്‍സിയ്യി'ക്കും വെള്ളത്തിനുമിടയില്‍ അഞ്ഞൂറു വര്‍ഷത്തെ വഴിദൂരമുണ്ട്. "അര്‍ശ്' വെള്ളത്തിന് മുകളിലാണ്. അല്ലാഹു "അര്‍ശി'നു മുകളിലാണുളളത്. നിങ്ങളുടെ കര്‍മ്മങ്ങളില്‍ യാതൊന്നും അല്ലാഹുവില്‍ നിന്ന് മറഞ്ഞുകിടക്കുന്നില്ല.'' (അബ്ദുര്‍റഹ്‍മാന്‍ ഇബ്നു മഹ്ദി ഇബ്നു മസ്ഊദില്‍നിന്നും മൌഖൂഫായി റിപ്പോര്‍ട്ട് ചെയ്തത്. ഇമാം ദഹബി ഈ അഥറിന് വേറെയും പരമ്പരകളുണ്ടെന്ന് പറഞ്ഞിട്ടുണ്ട്. നബിﷺയിലേക്ക് ഇത് ചേര്‍ത്തപ്പെട്ടിട്ടില്ലെങ്കിലും അപ്രകാരം ചേര്‍ത്തപ്പെട്ട മര്‍ഫൂഇന്റെ വിധി തന്നെയാണ് ഈ അഥറിനുളളതെന്ന് പണ്ഡിതന്‍മാര്‍ വ്യക്തമാക്കി. കാരണം, ഗൈബുമായി ബന്ധപ്പെട്ട ഒരു കാര്യവും നബിﷺയുടെ അധ്യാപനമില്ലാതെ ഇബ്നു മസ്ഊദ്(റളിയല്ലാഹു അന്‍ഹു)വിനെ പോലുളള സ്വഹാബി പറയുകയില്ല, മാത്രമല്ല അദ്ദേഹം ഇസ്രാഈലീ കഥകള്‍ ഉദ്ധരിച്ചതായി യാതൊരു രേഖയുമില്ല.)

ഏഴ് ആകാശങ്ങള്‍ (سَبْع سَمَاوَات) എന്ന പ്രതിപാദ്യം ഖുര്‍ആനില്‍ ഒട്ടനവധി സ്ഥലങ്ങളില്‍ പരാമര്‍ശിച്ചിരിക്കുന്നു. അതുപോലെ തന്നെ, ഹദീസ് ഗ്രന്ഥങ്ങളിലും ഈ ആശയത്തിന് ശക്തമായ ഊന്നല്‍ ലഭിച്ചിട്ടുണ്ട്. ഇതിനിടെ, ശാസ്ത്രം അതിശയിപ്പിക്കുന്ന രീതിയില്‍ പുരോഗമിച്ചിട്ടും ഇന്നുവരെ ഒരു ആകാശത്തിന്റേയും അതിര്‍ത്തിയെ പോലും പൂര്‍ണമായി നിര്‍വചിക്കാനാവാത്തതാണ് നമുക്ക് മുമ്പിലുളള യാഥാര്‍ഥ്യം. ഈ സാഹചര്യത്തില്‍, ആകാശങ്ങളുടെ എണ്ണം, സ്വഭാവം, അതിന്റെ ഘടന തുടങ്ങിയ കാര്യങ്ങളില്‍ ശാസ്ത്രീയമായിതന്നെ സൂക്ഷ്മ വിവരങ്ങള്‍ ലഭിക്കണമെന്നത് ശാഠ്യമായി അവശേഷിക്കും. ലോകസൃഷ്ടാവായ അല്ലാഹു തന്റെ സൃഷ്ടികളെക്കുറിച്ച് വ്യക്തമായി പ്രസ്താവിച്ചിരിക്കുന്നതെല്ലാം അതേപടി വിശ്വസിക്കുകയെന്നതാണ് ഒരു വിശ്വാസിക്ക് ഏറ്റവും ഉചിതവും അഭികാമ്യവുമായ സമീപനം.

ക്വുര്‍ആന്‍ പ്രഖ്യാപിച്ച നിരവധി സത്യങ്ങള്‍ ആദ്യകാലങ്ങളില്‍ ശാസ്ത്രലോകത്തിന് മനസ്സിലാക്കുവാന്‍ കഴിയാതെ കിടന്നിരുന്നു. എന്നാല്‍, കാലക്രമേണ പുരോഗമിച്ച നിരീക്ഷണങ്ങളും ഗവേഷണങ്ങളും അവയുടെ സത്യത തെളിയിച്ചുതന്നിട്ടുണ്ട്. ഇവിടെയൊന്നും ശാസ്ത്രത്തിന്റെ നേട്ടങ്ങളെ തള്ളിക്കളയുകയല്ല. അതു ഇന്ന് വളര്‍ച്ചയുടെ ഉയരത്തിലേക്ക് സഞ്ചരിച്ചുകൊണ്ടിരിക്കുകയാണ് എന്നതില്‍ സംശയമില്ല. ലോകാവസാനസമയത്തോളം ശാസ്ത്രീയമായി പഠിക്കാനുള്ളത് അവസാനിക്കുകയുമില്ല. പക്ഷേ, സൃഷ്ടിയുടെ രഹസ്യങ്ങള്‍ മുഴുവനും ശാസ്ത്രത്തിന്റെ മുന്നില്‍ തുറന്നു കിടക്കുകയാണെന്ന് അതിനര്‍ത്ഥമില്ല. അതുകൊണ്ടാണ്, ശാസ്ത്രത്തിന്റെ കണ്ണ് എത്തിപ്പെടാനായിട്ടില്ലാത്ത പല സത്യങ്ങളും ക്വുര്‍ആനിലൂടെ ഒരു രൂഢ വിശ്വാസമായി നിലനില്‍ക്കുന്നത്. അതില്‍പെടുന്ന ഉദാഹരമാണ് ഏഴു ആകാശങ്ങളുടെ അസ്തിത്വം.

അല്ലാഹു പറഞ്ഞു: “ഭൂമിയോട് ഏറ്റവും അടുത്ത ആകാശത്തെ നാം ചില വിളക്കുകള്‍ കൊണ്ട് അലങ്കരിച്ചിരിക്കുന്നു.” (അല്‍മുല്‍ക്: 5) ഇന്നുവരെ ശാസ്ത്രം കണ്ടെത്തിയതെല്ലാം ഈ ഒന്നാം ആകാശത്തിന്റെ അതിര്‍ത്തിക്കുള്ളിലാണെന്ന് പഠനങ്ങള്‍ സൂചിപ്പിക്കുന്നു. അതിനപ്പുറത്തുള്ള ആറ് ആകാശങ്ങളെക്കുറിച്ച് ശാസ്ത്രത്തിന് സൂചനയോ ധാരണയോ പോലും ഇല്ലെന്നതാണ് യാഥാര്‍ത്ഥ്യം. നമ്മുടെ നക്ഷത്രമായ സൂര്യന്‍ ഭൂമിയില്‍ നിന്ന് ഏകദേശം എട്ട് പ്രകാശമിനുട്ട് അകലെയാണ് സ്ഥിതിചെയ്യുന്നത്. സൂര്യനില്‍ നിന്നും പുറപ്പെടുന്ന പ്രകാശം എട്ടു മിനുട്ട് കഴിഞ്ഞ് മാത്രമേ ഭൂമിയിലേക്ക് എത്തൂവെന്നും ഇതാണ് ഈ ദൂരത്തിന്റെ സാരം. നമ്മുടെ സൗരയൂഥത്തിന് ഏറ്റവും അടുത്ത് ഉള്ള നക്ഷത്രമായ പ്രോക്സിമാ സെന്‍റൗറി (Proxima Centauri) ഭൂമിയില്‍ നിന്നും നാലു പ്രകാശവര്‍ഷം (4.25 light years) അകലെയാണ്. നമ്മുടെ നഗ്നകണ്ണുകളാല്‍ കാണുന്ന നക്ഷത്രങ്ങളില്‍ മിക്കതും പത്തോ നൂറോ അതിലധികമോ പ്രകാശവര്‍ഷങ്ങളുടെ ദൂരത്തിലാണ് സ്ഥിതിചെയ്യുന്നത്. ഈ അനവധി നക്ഷത്രങ്ങളുടെ കൂട്ടത്തെയാണ് ക്ഷീരപഥം (Milky Way) എന്നു വിശേഷിപ്പിക്കപ്പെടുന്നത്. ഇതുപോലെ ധാരാളം താരസംഘങ്ങള്‍ (ഗ്യാലക്‌സികള്‍) ലോകത്തുണ്ടെന്നും അവയെക്കുറിച്ചുള്ള ശാസ്ത്രീയ പഠനങ്ങളും അതിന്റെ പുരോഗതിയും മുന്നേറികൊണ്ടിരിക്കുന്നു. ഈ പഠനങ്ങളെല്ലാം ഒന്നാനാകാശത്തിലെ (അഥവാ ഏഴ് ആകാശങ്ങളില്‍ താഴെയുളള ആകാശത്ത്) ഒരു ഭാഗത്ത് മാത്രം നടന്നുകൊണ്ടിരിക്കുന്നതാണ്. സുബുഹാനല്ലാഹ്!!! ഇത്ര മഹത്തായ ഒരു ബ്രഹ്മാണ്ഡത്തെ സൃഷ്ടിച്ചത് ഒരുവന്‍ മാത്രമാണ്, അവനാണ് സര്‍വ്വതും നിയന്ത്രിക്കുന്നത്. ഈ അടിസ്ഥാന സത്യം മനുഷ്യരില്‍ എപ്പോഴും സൂക്ഷ്മമായി ബോധ്യപ്പെട്ടിരിക്കണം; കാരണം മനുഷ്യന്റെ അനന്തമായ സകല നന്മകളുടെയും ആധാരം ഇതിലാണു നിലകൊള്ളുന്നത്.